ايران چيو آهي ته نون امريڪي ۽ اسرائيلي حملن جي جواب ۾ يورپ تي ڀرپور حملا ڪيا ويندا، جنگ جي صورت ۾ تيل 150 ڊالرز في بيرل کان به وڌي ويندو
ايران جي پارليامينٽ ميمبر حسين علي حاجي دليگاني خبردار ڪيو آهي ته جيڪڏهن آمريڪا ۽ اسرائيل ايران تي نئين جنگ مڙهي ته ايران جا جوابي ميزائل حملا يورپ تائين پهچي سگهن ٿا، جڏهن ته عالمي مارڪيٽ ۾ تيل جي قيمت 150 ڊالر في بيرل کان به مٿي ٿي سگهي ٿي
. ايراني پارليامينٽ ميمبر چيو ته ايران جو جواب دشمن جي حملي جي پيماني يا جڳهه تائين محدود يا ان جي برابر نه هوندو پر اهو وسيع، سخت ۽ حڪمت عملي تي ٻڌل هوندو، جنهن ۾ جاگرافيائي حدن جي ڪا به قيد نه هوندي.
هن چيو ته آمريڪا يا اسرائيل طرفان ڪنهن به ڪارروائي يا فوجي جارحيت جو جواب ڏنو ويندو،ايراني ميزائل يورپ ۾ موجود هدفن تائين پهچڻ جي صلاحيت رکن ٿا. اهڙي قسم جي ڇڪتاڻ عالمي مارڪيٽ ۾ تيل جي قيمتن کي 150 ڊالر في بيرل کان مٿي پهچائي سگهي ٿي.
حسين علي حاجي دليگاني ايران جي هٿياربند فوجن ۽ فوجي ڪمانڊرن جي ڪارڪردگي کي ساراهيندي، دعويٰ ڪئي ته ايران پنهنجي مخالفن جي وچ ۾ خوف، شڪ ۽ ڦوٽ وجهڻ ۾ ڪامياب ٿي ويو آهي، ۽ ملڪ مٿان ٽين جنگ مڙهڻ جي ڪوششن کي ناڪام بڻائي ڇڏيو آهي.