سوئٽزرلينڊ جي سائنسدانن هڪ جديد آزمائشي اوزار تيار ڪيو آهي، جيڪو جسم ۾ لڳائڻ کانپوءِ بجليءَ جي مدد سان رت ۾ شگر جو مقدار گهٽائي سگهي ٿو، جنهن سان شگر ۽ ٿولهه جي علاج لاءِ نيون اميدون پيدا ٿيون آهن
اي ٽي ايڇ زيورخ يونيورسٽي جي تحقيق ڪندڙن جوڙيل اهو اوزار رت ۾ موجود واڌو شگر کي گلوڪونيٽ ۾ تبديل ڪري ٿو، جنهن کي گڙدا پيشاب وسيلي جسم مان ٻاهر ڪڍي ڇڏين ٿا
تحقيق موجب، وائرليس ٽيڪنالاجيءَ سان هلندڙ هن اوزار کي رت ۾ شگر جو مقدار لڳاتار ماپيندڙ نظام سان ڳنڍيو ويو آهي. ڪوئن تي ڪيل تجربن دوران هن نظام پاڻمرادو رت ۾ شگر جو مقدار ضابطي ۾ رکڻ جا نتيجا ڏيکاريا
تجربن مان اهو پڻ ظاهر ٿيو ته هي اوزار جسم ۾ گڏ ٿيل چرٻيءَ جي استعمال کي وڌائڻ ۾ مدد ڪري ٿو، جنهن سان هڪ ئي وقت شگر ۽ ٿولهه جي علاج جا امڪان پيدا ٿيا آهن
ماهرن موجب، سڄي دنيا ۾ اڍائي ارب کان وڌيڪ ماڻهو شگر ۽ ٿولهه جي گڏيل مسئلي ۾ مبتلا آهن. هن وقت انهن بيمارين جي علاج لاءِ انسولين ۽ مختلف دوائون استعمال ڪيون وڃن ٿيون، جن جا ڪي هاڃيڪار اثر پڻ سامهون ايندا رهن ٿا
بهرحال، سائنسدانن جو چوڻ آهي ته نئون اوزار اڃا آزمائشي مرحلي ۾ آهي ۽ ان جا نتيجا رڳو ڪوئن تي ڪيل تجربن مان حاصل ٿيا آهن. انسانن ۾ ان جي اثرائتي ۽ محفوظ هجڻ جي پڪ ڪرڻ لاءِ وڌيڪ تحقيق ۽ طبي آزمائشون ڪرڻيون پونديون