بچاءَ واري وزير خواجا آصف مولانا فضل الرحمان جي تنقيد جو جواب ڏيندي چيو آهي ته تهران ۾ نه ڪو دفاعي معاهدو ٿي رهيو هو ۽ نه ئي پاڪستان جي دفاع بابت ڳالهه ٻولهه ٿي رهي هئي، تنهنڪري اتي سندس موجودگي ضروري نه هئي
قومي اسيمبلي ۾ مولانا فضل الرحمان جي گذريل ڏينهن واري تقرير جو جواب ڏيندي خواجا آصف چيو ته تهران ۾ ٿيندڙ ڳالهين جو تعلق بچاءَ واري وزارت جي دائري ۾ نه هو، جڏهن ته تازن ٻن دفاعي معاهدن ۾ هو بچاءَ واري وزير طور شريڪ رهيو آهي
هن چيو ته فيلڊ مارشل امن ڪرائڻ لاءِ تهران ويو هو، هن هڪ جنگ روڪرائي آهي ۽ يمن جو تڪرار به شدت اختيار ڪري سگهيو ٿي
خواجا آصف موجب عالمي سطح تي پاڪستان ۽ فيلڊ مارشل جي ڪردار جو اعتراف ٿيڻ گهرجي، جڏهن ته سندس ڪوششون امن جي عمل کي اڳتي وڌائڻ لاءِ آهن، هن اميد ظاهر ڪئي ته ايندڙ ڏينهن ۾ وچ اوڀر ۾ هاڪاري نتيجا سامهون ايندا
خواجا آصف مولانا فضل الرحمان کي مخاطب ٿيندي چيو ته هو کيس شرم ۽ حياءَ جا مهڻا ڏئي ٿو ، پر کيس به پنهنجي ماضيءَ تي نظر وجهڻ گهرجي
هن سوال ڪيو ته مولانا فضل الرحمان 40 سالن دوران ڪهڙن عهدن جا فائدا ورتا ۽ ڪشمير ڪميٽيءَ جي 10 سالن واري چيئرمين شپ دوران ڪهڙيون خدمتون سرانجام ڏنيون؟
خواجا آصف چيو ته مولانا جو ماضي تضادن سان ڀريو پيو آهي ۽ هتي ڪو به مڪمل طور بي داغ ناهي